رام اللہ،22اگست(ایس او نیوز/آئی ا ین ایس انڈیا)فلسطین میں سرکاری سطح پر جاری کردہ ایک رپورٹ میں بتایا گیا ہے کہ رواں سال (2017ء) کے دوران فلسطینی شہروں میں اسرائیلی فوج کے روز مرہ کی بنیاد پر جاری رہنے والے کریک ڈاؤن میں کم سے کم 3800 فلسطینیوں کو پابند سلاسل کردیا گیا ہے۔ فلسطینی محکمہ امور اسیران کی طرف سے جاری کردہ رپورٹ میں کہا گیا ہے کہ اسرائیلی فوج نے روزانہ کی بنیاد پر فلسطینی شہریوں کی گرفتاریوں کے لیے اجتماعی کریک ڈاؤن جاری رکھا۔ پورے پورے فلسطینی خاندانوں کو پابند سلاسل کیا گیا۔
محکمہ امور اسیران کے چیئرمین عیسیٰ قراقع نے اپنے ایک بیان میں بتایا کہ قابض فوج نے فلسطینیوں کو ہراساں کرنے کے لیے ان کے خلاف اجتماعی کریک ڈاؤن کی پالیسی اپنا رکھی ہے۔ اسرائیلی فوج کی بھاری نفری کسی ایک فلسطینی قصبے کو گھیرے میں لے کر گھر گھر تلاشی کی کارروائیوں کے دوران نہتے فلسطینیوں کو زدو کوب کرتی، گھروں میں توڑپھوڑ کرتی اور لوٹ مار کے ساتھ فلسطینی شہریوں کو بغیر کسی الزام کے حراست میں لینے کا سلسلہ جاری رکھے ہوئے ہے۔ان کا کہنا ہے کہ فلسطینی شہریوں کی اجتماعی گرفتاریاں عالمی قوانین کی سنگین خلاف ورزی ہیں۔ اسرائیلی فوج جس بے دردی کے ساتھ نہتے فلسطینیوں کو حراست میں لیتی اور انہیں انسانیت سوز مظالم کانشانہ بنا رہی ہے وہ بین الاقوامی اخلاقیات اور عالمی اصولوں کی سنگین خلاف ورزی ہے۔عیسیٰ قراقع کا کہنا ہے کہ اس وقت اسرائیلی زندانوں میں 6400فلسطینی پابند سلاسل ہیں۔ ان میں 10کم عمر بچیوں سمیت 62خواتین، 300بچے اور 450انتظامی حراست کے قیدی شامل ہیں۔ اسیران میں فلسطینی پارلیمنٹ کے 12منتخب ارکان بھی شامل ہیں۔